Raajeshwar babu aaj bahut khush hain. Aaj unka beta, Rajan, poore 5 saal baad vilaayat se apni padhai poori kar ke ghar jo aa raha hai. Poore ghar mein chahal pahal hai. Rajan ki maa ki toh aaj par lag aaye hain. Chehre se hansi toh jaise hatati hi nahin hai. Kyun naa ho, aaj itne arse baad apne laadle kaa mukhda jo dekhegi. Aaj ghar mein Rajan ki pasand ki khane ki saari cheezein bani hain. khaas taur se use meethe chawal bahut pasand hain.
Sunaina (Rajan ki pyaari, eklauti bahan) bhi aaj apne pati Ranjeet ke saath apne bhaiya ke swagat ke liye maayke aayi hui hai. Ranjit aaj tak Rajan se mil nahin paaya hai kyunki Rajan pichhle saal apni pyaari eklauti bahan ke vivah main bhi nahin aa paaya tha. Is karan se Ranjeet ki utsukta bhi charam pe hai.
"Rajan ki maa, main damadji ke saath Rajan ko lene hawaai adde jaa raha hun". Rajeshwar babu ka dhairya ab jawaab de raha hai.
"Arre! abhi toh chaar ghante baaki hain uske aane mein. Abhi se jaakar kya karoge?" Sulochana( Rajan ki maa) boli. "Hoon! lagta hai laadle ko dekhne ki utsukta mein samay bhi bhool gaye aap."
Raajeshwar babu ne ghari pe ek nazar daali. Abhi toh ek hi baje hain. Rajan ki flight 5 baje aayegi. Raajeshwar babu ko ek-ek pal yugon se lambe prateet ho rahe hain. Unke ghar se hawai adde ki doori bamushkil 5 kilometer hi toh hai. Apni gaadi mein mushkil se 15 minute lagenge.
Jab kuchh aur naa sujha toh Rajeshwar babu ne album nikali aur apne laadle ko nihaarne lage. Unhein apna beeta hua kal, apna ateet, aur jindgi ke saare khatte meethe pal pratyaksh dikhne lage, jaise kal ki hi baat ho.
Gaaun ke ek chhote se kisaan ke bete the Rajeshwar babu. Kisi tarah se unke pita ne unhe itna padha likha diya ki veh gaaun ke hi sarkari prathmik vidhyalay mein ganit ke adhyapak ban gaye. Fir 21 saal ki umra mein unki sulochana se shaadi ho gayi. Shaadi ke 2 saal baad hi unke pita kaa diorrhea ke kaaran mrityu ho gayi. Unki maa se yeh sadma bardaast nahin ho paaya aur unhone ne bhi khatiya pakad li. Aur 2 mahine baad unka bhi swargawaas ho gaya. Tab Sulochana garbhavati thi. Rajeshwar babu ne tabhi yeh faisla kar liya tha ki apne bete ko woh doctor banayenge. 6 mahine baad hi Sulochana ne ek sundar se baalak ko janma diya. Rajeshwar babu ki toh jaise mann ki muraad poori ho gayi.
Gaaun mein rahkar apne bete ko doctor bana paana unhe sambhav naa laga. Rajan jab 3 saal ka hua toh Rajeshwar babu ne apna tabadla Patna karwa liya. Lekin Patna jaise shahar mein bhi prathmik vidyalaya kaa ek shikshak apne bete ko doctor kaise bana paayega? Een sawaalon kaa jawaab bhi unhe khud hi dhoondhna tha. Aur unhone iska bhi jawaab dhoondh liya. Shaam ke char baje tak woh school mein padhate the, 4 se 8 baje tak woh coaching center mein padhane lage. Raat 8 baje se 10 baje tak woh apne aas padosh ke bachchhon ko apne ghar pe hi tuition dene lage.
Unki is kathor tapasya ko Rajan ne bahut najdeek se dekha tha aur unke dil ko mahsoos kiya tha. Usne har haalat mein apne pita ke sapnon ko saakaar karne ki kasam si kha li thi. Bachpan se hi har saal apni kaksha mein awwal rahne laga. Woh bahut hi medhavi aur dridh pratigya tha. Aakhir ek din baap-bete ki kathor tapasya rang laayi aur Rajan ko Amerika ke sarwashreshtha medical vishwavidyalaya mein dakhile ke liye choona gaya.Uske dakhile ke liye hue pariksha main sabse jyada ank the. Is kaaran vishwavidyalaya ki taraf se uska saara kharch wahan karne ki peshkash hui. Aur apne pita ke sapnon ko poora karne ke liye, unki kathor tapasya ko saarthak karne ki saugandh liye Rajan Amerika le liye rawaanaa ho gaya.
Aaj poore paanch saal baad sapnon ko hakikat kaa roop dene ke liye woh waapas aa raha hai.
"Aji sunte ho, 4 baj gaye hain, Ab aapko hawai aade nahin jaana kya?" Sulochana kitna bhi chhupa le, lekin maa ki mamta aur uski bekraari bhi nahin chhup sakti. Sulochana ki awaaz se Raajeshwar babu ki tandra jaise tuti ho. Woh apne ateet se waapas vartman mein aa gaye. Aankhon mein aa rahe khooshi ki aanshuon ko unhone apne palkon mein sahej liya.
Abhi Ranjeet ke saath bahar nikalne ko hi the ki TV par chal rahe "AAJ TAK" par news samvaaddaata ki aawaaz sunai dee:
"Abhi abhi prapt suchna ke anusaar New York se Kolkata aane waali flight-IC4082A, Kolkata hawaai adde ke karib durghatanagrasta ho gayi hai. Prapt suchna ke anusaar yeh durghatana karib aadhe ghante pahle hui thi.Plane mein sawaar sabhi 280 sawaariyon ke maare jaane ki khabar hai. Plane ke saare crew members ke bhi maare jaane ki aashanka hai. Yeh durghatana kaise hui, iske baare mein vistreet jaankaari ke liye hum aap ko lekar chalte hain durghatana sthal par."
Rajeshwar babu ki kaato toh khoon nahin. Woh paththar ki moorat ki tarah apne sthan pe khade rah gaye.Chehre pe hazaaron bhav aa rahe the , jaa rahe the.Sulochana bhi kuchh der tak bhavheen khadi rah gayi. Paaglon ki tarah kabhi sunaina se toh kabhi Ranjeet se poochhti ki kya mera Rajan bhi isi plane mein sawaar tha. Lekin unke aankhon se bahte aviral aansu, unke safed pad chuke chehre ne use bata diya ki uska laadla bhi usi plane mein tha.
Dard jab had se gujarta hai toh jwalamukhi ki bhanti fat padta hai. Aur Sulochana toh maa thi. Maa bhale apne bete ki maut ki khabar ko kaise bardasht kar sakti thi. Ek cheetkaar ke saath woh jameen par ludhak gayi. Ab jaakar Rajeshwar babu ki tandra tooti. Daude hue Sulochana ki taraf bhaage. Par maa toh apne bete se milne ke liye swarga ke maarg par nikal chooki thee. Ek pal mein Rajeshwar babu ki saari duniya tinke ki maafik bikhar gayi.
Ranjeet ki samajh mein toh kuchh bhi nahin aa raha tha. Udhar Sunaina behaal hui padi thi, Idhar Rajeshwar babu sadme se paththhar ban gaye the. Kise sambhale, kaise sambhale? Tab tak shor sunkar aas-padosh waale bhi pahunch gaye.
Raat 10 baje ke karib Rajan ki laash ko lekar Ranjeet waapas ghar aaya. Baahar gaadi ki awaaz sunkar Rajeshwar babu bhaage-bhaage aaye. Dil mein ek naummid si ummid ki kiran liye, ki shayad unka ladla us plane mein naa ho. Abhi gaadi se hattha kattha nikale aur baba baba kahkar unse lipat jaaye.
Parantu ummid ki kiran hakikat ke andhkaar ko cheer nahin paayi. Rajeshwar babu ki pathara chuki aankhon ne jab apne bete ki laash dekhi toh ek jhatke mein fat padi. Pahli baar kisi ne ek 50 saal ke adher mard ko ek 5 saal ke abodh baalak ki bhaanti bilakh bilakh kar rote dekha hoga. Unke saare sapne toot chuke the, saari tapasya , saari kurbaniyan bekar ho gayi thi.
In sab kaa yeh sila mila tha unhe. Upar waale ne yeh sila diya tha unki prarthanaon kaa.
Ek jhatke mein unki saari duniya loot chuki thi. Unki praan priya aur unka laadla, donon ne hi bich manjhdhaar mein unka daaman chhod diya tha. Jindgi ke harek kasht ko hanskar sahne waale Rajeshwar babu jaisa insaan bhi aise toofan ko bhala kaise sah paata!!!
Agle din subah antim kriya honi hai, yeh nirnay karke aas parosh waale chale gaye. Sunaina is aparampaar dookh ko sah nahhin paa rahi thi aur baar baar behosh ho rahi thi. isliye Ranjeet use lekar aspataal chala gaya.
Sabhi logon ke chale jaane ke baad jab Raajeshwar babu ghar mein waapas aaye toh kitchen se patile ke girne ki awaaz aayi. Shayad billi ne kuchh giraya tha. Raajeshwar babu jab kitchen mein gaye toh dekha ki mithe chawal waala bhagona jameen pe gira hua tha. Aur usme rakhe saare mithe chaawal jameen par bikhar chuke the. Bilkul Raajeshwar babu ki duniya ki tarah. Unke aankhon ke aage ghanghor andhera chhane laga. Aur ek chitkaar ke saath woh bhi jameen pe ludhak gaye.......
